Onsdag 11. til fredag 13.februar var 9c, 9d og 9e på leirskule på Fjellsætra. Fyrste dagen tok vi med oss heile gjengen og gjekk på tur. Pausa var lagt til eit område med mulighet for å lage skihopp. Mange gutar var aktive der, flotte hopp og mange fall! Elles var aktiviteten snødukking, så heldigvis hadde mange av elevane hettegensar og joggebukse!:) Frå klokka seks var det kveldsope i trekket, og Gunhild(som eg er kontaktlærar saman med) og eg fekk stått litt på telemark og sett på og snakka mykje med elevane.
Leggeprosessen er eit kapittel for seg sjølv fyrste natta på leir. Det veit alle som har vore leiarar! Forrige helg hadde eg med Hedda som leiar for Hareid Ten Sing på vintertreff i Ulsteinvik, og eg kan vel rett som det er seie at denne fyrste natta var ganske lik som fyrste natta på VT. På Fjellseter ungdomssenter, der vi overnatta, må nokre ligge på hytter medan resten får ligge i hovudhuset. Vi tenkte at gutane skulle få ligge inne, slik at vi kunne ha ein viss kontroll over dei. Denne fyrste natta la jentene seg klokka tolv, og eg må innrømme at akkurat då skulle eg ønske at det var gutane som fekk ligge på hyttene. Det siste stadfesta tidspunkte eg veit er at nokon var våken var 02.40 på grunn av ein telefon til ein annan elev. Eg veit og at eg var våken klokka 03.54 og då var det stilt. Så dei vart vel trøtte til slutt.
Neste dag var vi i trekket på dagtid, og då kvelden kom var mange så trøtte at dei ikkje orka kveldskøyring. Vi hadde ei lita ykt med leikar, og Ole Lukkøye kom heldigvis litt raskare denne natta. Nokre elevar har og fått lære litt om massesuggesjon, skjønt eg veit ikkje heilt om dei kjenner til det ordet enno. Helga før vi skulle på tur var det eit skulekorps frå Ulstein kommune som var på korpstur til Fjellsætra. Dei blei fortalt at det var ein gong ei jente som døde, og som no går att. Så då ting forsvann(i alt rotet), det knirka i(det gamle) huset og då det minka på brus og kjeks(som to frekke gutar hadde forsynt seg med) var det ikkje tvil om at "nokon var der". Eg veit at eg hadde vore akkurat lik dei forskremte jentene den gongen eg var konfirmant på leirskule. Men heldigvis er eg no vaksen, og har lært meg å velge vekk kva eg vil tenke på. Det tok ikkje så lang tid å få ro i gjengen, og som eine jenta sa; "eg trur vi kjem til å flire av dette på bussen heim i morgon!" Eg satt ikkje på bussen, men eg trur nok dei flirte!
Neste morgen var der pakking, vasking og heimreise. Det gjekk som smurt, og no gler eg meg til neste helg, for då reiser eg på ferie utan elevar. Kjekt med og kjekt utan!
